O Goberno Central aprobou un novo paquete de reformas laborais que
teñen unha gravísima incidencia no mundo do traballo e nomeadamente no
sector financeiro. As Entidades Financeiras foron as máximas beneficiarias
da Reforma Laboral, facilitando despedimentos colectivos e abaratando os
seus custes. As novas reformas agravan esta situación.
Xubilación anticipada involuntaria: As persoas despedidas con máis idade son as
que teñen máis difícil a reinserción no mundo laboral, e agora terán aínda máis
obstáculos para acollerse á xubilación. Increméntase o custe das prexubilacións vía
ERE ,que se están utilizando en todos os sectores en crise, tamén no financeiro.
Poderán realizarse con 4 anos máximo de anticipo sobre a idade de xubilación que
corresponda en cada caso. Modifícanse tamén os coeficientes redutores.
Subsidio desemprego para maiores de 55 anos: Na anterior reforma subiron de 52
a 55 anos a idade de percepción, agora eliminan o cobro en base aos ingresos da
unidade familiar. É unha medida que penaliza as persoas con máis dificultade a
hora de atopar traballo.
Endurecemento dos ERE: Ante calquera expediente de Despedimentos Colectivos os
sindicatos tratabamos de incluír voluntariamente ao persoal maior de 55 anos,
incrementando a indemnización, implantando así prexubilacións ou sistemas
semellantes menos traumáticos. Coa reforma penalizan as prexubilacións, polo que
haberá máis despedimentos e centraranse no persoal menor de 55 anos.
Impacto dende perspectiva de xénero: O Tribunal Europeo tiña ditado sentenza
declarando discriminatorio o modo de cálculo das prestacións nos contratos a
tempo parcial. Malia esta sentenza, o PP endureceu agora os criterios para acceder
ás xubilacións no caso das mulleres con contratos a tempo parcial.
Mobilízate con nós!!!
Concentracións:
Ás 20:00 horas
A Coruña, na Subdelegación do Goberno
Compostela, na Praza do Toural
Ourense, diante da Subdelegación do Goberno
Pontevedra, na Praza da Peregrina
Vigo, na farola de Urzaiz
Lugo, diante da Subdelegación do Goberno
Ás 19:00 horas
Ferrol, na Praza do Concello
Ningún comentario:
Publicar un comentario